I got sunshine...

Ný vika þýðir nýtt blogg :)

Fyrsta próf annarinnar afstaðið en hvernig gekk er svo annar handleggur. Hef tekið þá stefnu að hugsa sem minnst um það þar til einkunnir koma í hús.

Síðasta vika leið svosem tiltölullega hratt. Fór í próflokapartý hjá einni í bekknum á mánudagskvöldið þar sem okkur langaði öllum að lyfta okkur upp eftir frekar daufa lærdómshelgi.

Sú sem hélt partýið býr á flottum stað með útsýni yfir alla Gautaborg. Hún býr í fyrrum vatnsturni sem gnæfir yfir borgina. Nokkuð töff að veggirnar í íbúðinni hennar eru ekki beinir heldur í boga, sem er þó kannski ekki einkar hagkvæmt svona upp á að raða húsgögnum að gera.

En partýið var hið fínasta þó þreyttur Stellulingur hafi nú ekki verið neitt rosalega lengi frameftir sökum takmarkaðra almenningssamgangna og almennar þreytu bara.

Í vikunni var okkur líka skipt niður í hópa fyrir næsta verkefni í faginu. Eigum að gera viðskiptaáætlun og stjórna hóteli í gegnum tölvukerfi. Okkur var úthlutað stöðum í fyrirtækinu og fékk ég stöðu fjármálastjóra eða CFO.... Hver treystir Íslendingi fyrir ábyrgri fjármálastjórn í dag??

Helgin fór svo í útstáelsi. Kíkti út bæði föstudag og laugardag auk þess sem ég tók mér góðan hjólatúr á laugardeginum. Hjólaði niðrí bæ, sem er ca.8 km frá heimili mínu og svo heim aftur eftir að hafa tekið smá bæjarrölt og eytt smá pening.

Var líka nánast aðframkomin á heimleiðinni og brekkurnar virkuðu mér ofviða, en það hafðist og heim komst ég.

Nú tekur við ný vika í verkefnavinnu.

Stay tuned for more..

Stellino

You don't put baby in a corner

Tíminn líður svo hratt, ný helgi komin áður en maður veit af.

Ætla þó aðeins að segja frá síðustu helgi áður en ég vík að vikunni og því sem hefur verið að gerast.

Síðasta helgi var náttúrulega bara æði. Fór til Stokkhólms þar sem Villi og foreldrar hans biðu mín. Byrjuðum á því að ferðast til Lidingö þar sem Villi á heima til að sýna foreldrunum vistaverur hans næsta árið eða svo. Settumst svo aðeins í garðhornið hans Villa með bjór og rákum þá augun í þetta líka flotta plómutré sem voru hinar ljúffengustu! Nema sú sem ég fékk - fyrsti biti leiddi í ljós lirfur og annað ógeð og var því ekki lengi að skyrpa henni útúr mér. Var svo með hroll lengi á eftir.

En maður hristi þetta af sér að lokum ákváðum við að skottast niðrí bæ til að finna einhvern góðan stað til að borða á. Það tók sinn tíma en að lokum fundum við æðislegan sushi-stað sem heitir East. Var alveg geðveikt gott og mæli með þessum stað ef þú átt leið hjá Stokkhólmi.

Á laugardeginum byrjuðum við Villi daginn á að fara að vatni á Lidingö. Fundum frábæran og sólríkan stað við vatnið en ókosturinn var þó að drekaflugunum líkaði líka svona asskoti vel við hann. Held ég hafi séð alveg 10 stykki á tímabili, en þá ákváðum við að flýja.

Fórum svo niður í bæ að hitta Siggu og Þórarinn og tókum þau á kaffihús í Kungsholmen þar sem hægt var að spila boccia. Skoruðum á þau í einn leik sem fór ekki betur en svo að við töpuðum þrátt fyrir góða forystu í byrjun. Nenni svo ekkert að segja nánar frá því hvernig leikar fóru þegar skipt var um lið.

Fórum svo og borðuðum á fínum indverskum stað um kvöldið og tókum svo drykk í lobbyinu á hótelinu sem Sigga og Þórarinn gistu á áður en komið var að kveðjustund.

Sunnudagurinn fór í chill aðallega. Kíktum niðrí miðbæ og sáum að Volvo var með opið showroom svo við ákváðum að kíkja inn. Þegar inn var komið sáum við vagna og kerrur í tugatali. Forvitnin var okkur yfirsterkari svo við laumuðumst á efri hæðina þar sem fjölskyldufólk var samankomið með öll öskrandi börnin sín. Þar sem verið var að bjóða uppá muffins og kampavín (góð blanda) ákváðum við að dvelja aðeins í látunum, eða þar til við vorum búin með kampavínið.

Á mánudeginum var svo komið að heimför.

Það er svo búið að vera mikið að gera í skólanum undanfarið. Skiluðum inn verkefni á fimmtudaginn sem gekk út á að meta svokallað interactive guide system sem átti að nota á sýningu á safni hér í bæ.

Höfðum farið nokkrum dögum áður og prófað kerfið í sambandi við sýninguna, sem fór ekki betur en svo að kerfið virkaði ekki. Var því aðeins erfitt að meta sjálft kerfið en við gerðum okkar besta. Verkefnið gekk rosa vel og við fengum hæstu einkunn :) Frekar næs að vera komin með 20% af einkunn í hús.

Það eru þó engin rólegheit framundan því á mánudaginn er lokapróf í hinu faginu sem ég er í. Gildir 40% svo maður þarf að eyða helginni í lærdóm þrátt fyrir sól og blíðu. Sólarsjúka-Stella öskrar inní mér yfir óréttlæti heimsins!!

En til að detta ekki í algjört þunglyndi þá ákvað ég þó aðeins að taka breik í gær og kíkja út með fellow-Íslendingnum Herði (You have been mentioned). Fórum og fengum okkur pítsu og öl sem var mjög kærkomið.

Kom svo heim á mjög sómasamlegum tíma, enda er maður alltof skynsamur, og við tók tribute til heiðurs Patrick Swayze - Dirty Dancing! Klassa ræma og kallinn flottur í henni.

Setjum punktinn á þetta í bili.

Stay tuned..

Stellino

Meistari Aladín..

Jæja, margt að gerast síðan síðast...

Villi kominn og farinn. Áttum góða helgi saman hérna í Gautaborg þrátt fyrir misskemmtilegt veður. Það var gjörsamlega eins og hellt úr fötu daginn sem hann kom og gangan úr strætónum og heim var frekar skrautleg þar sem við vorum bæði orðin blaut í gegn og komum heim algerlega holdvot. Gerðum því ekki mikið þann daginn heldur tókum því bara rólega hérna heima við.

Veðurútlit á föstudeginum var ekki mikið betra (þó aðeins) en það aftraði okkur þó ekki að kíkja aðeins niður í bæ. Byrjuðum á að leita skjóls frá rigningunni í skólanum mínum þar sem ég nýtti tækifærið og sótti mér skólabók á bókasafnið. Nokkrum mínútum seinna stytti upp þannig að við gátum haldið út á ný og gengum við að Skansen Krona sem er gamall varnarturn á hæð hér í Gautaborg.


Eftir að hafa skoðað Gautaborg úr þónokkurri hæð fórum við á kaffihús í gamla bænum og héngum þar í nokkurn tíma í skjóli frá rigningu og kulda sem herjaði á okkur.

Ætlunin var svo að join-a nokkra bekkjarfélaga mína á svokölluðu AfterWork sem er á mörgum pub-um á föstudögum (þar sem alls konar tilboð eru í gangi). Sú ætlun gekk ekki eftir þar sem röðin inná staðinn var frekar löng...

Tókum því þá ákvörðun að fara frekar heim í afslöppun. Byrjuðum á að spila trivial og enduðum svo í heita pottinum með heimilisfólkinu til rúmlega tvö um nóttina.

Laugardagurinn var ekki eins hress þó veður væri með fínasta móti. Okkur tókst þó að rísa úr rekkju að lokum og drífa okkur í Liseberg. Öllum tækjum var þó sleppt heldur lékum við okkur bara í lukkuhjólum og þrautum. Stefnan er að taka tækin með trompi næst :)

Eftir tívolí var svo farið heim og við tók örvæntingafull leit að sushi stað í nágrenninu sem endaði á því að hlaupið var um hverfið í leit að stað áður en það lokaði. Það tókst og Stellan var sátt :)

Villi fór svo heim rétt eftir hádeginu á sunnudeginum en þá tók við lærdómur hjá mér þar sem ég hafði ekki litið í bók frá því að skólinn byrjaði.

Skólavikan byrjaði svo á því að okkur var úthlutað verkefni sem við eigum að vinna í hópum og gengur út á interactive guide kerfi á listasafni sem þú færð beint í símann þinn. Mjög spennandi hugmynd. Hljómar vel á pappírnum en í gær fór minn hópur að testa kerfið á safninu. Gekk ekki betur en svo að kerfið virðist ekki tilbúið. Mikið af hálfkláruðum fítusum sem virka ekki.

Var því hálfmisheppnað. Skil á case í næstu viku svo nú er unnið á fullu við að koma sér í lærigírinn.

Þó er álagið ekki það mikið ennþá að maður hafi ekki tíma fyrir helgarferð, svo stefnan er tekin á Stokkhólm um helgina. Heimsækja drenginn á nýja staðinn auk þess sem foreldrar Villa eru í stuttu stoppi í Stokkhólmi frá Belgrad á leið sinni til hins ástkæra Íslands.

Segjum þetta gott í bili, farin í lærdóminn..

Stellino át!

Wont you take me out 2night

Fyrsti formlegi skóladagurinn var í gær og leggst námið bara vel í mig. Verður krefjandi en maður mun bara leggja metnað sinn í að gera vel.

Er í tveim fögum á hverju misseri sem stendur í 10 vikur, misserinu lýkur með prófum áður en næsta misseri hefst. Mjög þægilegt því þá ætti maður að geta sinnt báðum fögum í hverjum tíma frekar en að eitt eða tvö sitji á hakanum þegar maður er í 5 fögum í einu.

Skólinn byrjar annars rólega. Skóli í gær, frí í dag, skóli á morgun og frí á föstudaginn. Kvarta ekki undan því.

Annars verður þetta ótrúlega skemmtileg helgi þar sem kallinn ætlar að kíkja yfir um helgina. Frekar mikið frábært :) :) Brosi hringinn yfir því!!

Ekki meira í bili,

Stay tunded,

Stellino át!!